2 Samuel 2
1 這事以後，大衛求問上主：「𠊎做得上猶大个一個城市去麼？」上主應講：「做得。」大衛問：「㖠個城呢？」上主講：「希伯崙。」
2 所以大衛到希伯崙去，帶等佢兩個𡜵娘—耶斯列人亞希暖㧯迦密人拿霸个寡婦愛比該。
3 大衛也帶等部下㧯佢等个家族共下去。佢等在希伯崙周圍个城市住。
4 猶大人就到希伯崙來，膏油設立大衛做猶大个王。大衛聽講基列地區雅比城个人民埋葬掃羅，
5 就派使者到該位去，對佢等講：「願上主賜福給你等，因為你等對主人掃羅忠心，將佢埋葬。
6 願上主對你等信實，永遠愛護你等；𠊎也會因你等所做个來好款待你等。
7 愛勇敢堅強！你等个主人掃羅死掉，總係猶大个人民已經膏油設立𠊎做佢等个王。」
8 掃羅軍隊个元帥尼珥个孻仔押尼珥識將掃羅个孻仔伊施波設帶過約旦河，到瑪哈念去。
9 在該位，押尼珥立伊施波設做王，統治基列、亞設、耶斯列、以法蓮、便雅憫，事實上係全以色列。
10 掃羅个孻仔伊施波設做以色列王个時四十歲；佢統治以色列共兩年。總係猶大支族全部對大衛盡忠心；
11 大衛在希伯崙做王治理猶大共七年半。
12 尼珥个孻仔押尼珥㧯掃羅个孻仔伊施波設个官員對瑪哈念到基遍去。
13 洗璐雅个孻仔約押㧯大衛个官員到基遍个陂塘滣㧯佢等相會。大家全部坐好了，一隊在陂塘這片，一隊在陂塘該片。
14 押尼珥對約押講：「𠊎等各派幾個後生人出來比武拚看仔好麼？」約押應講：「好。」
15 所以，有十二個人代表掃羅个孻仔伊施波設㧯便雅憫支族出來，㧯大衛該片个十二個人比武。
16 逐儕攏總揪等對方个頭那，用劍刺入對方个脇下。恁樣，二十四個人全部橫落去，死共下。所以基遍該地方就安到「劍場」。
17 該日，雙方打到盡厲害。押尼珥㧯以色列人被大衛該片个人打輸了。
18 婦女洗璐雅个三個孻仔全部在該位，佢等三儕係約押、亞比篩㧯亞撒黑。亞撒黑走起來像野鹿恁遽，
19 佢就去追押尼珥，無偏左右，直直追等去。
20 押尼珥轉頭一看，講：「亞撒黑，係你麼？」亞撒黑講：「係！」
21 押尼珥對佢講：「毋好追𠊎，去追別个兵仔，搶佢个東西。」總係亞撒黑還係緊追毋放佢走。
22 押尼珥再過對亞撒黑講：「毋好追𠊎！你愛𠊎㓾你係麼？㓾掉你，𠊎樣會有面皮見若哥約押呢？」
23 總係亞撒黑還係毋肯斡頭轉去。所以，押尼珥向後背㧹槍，刺穿亞撒黑个肚笥；槍對佢个背囊穿出去，佢就橫下去死掉。眾人追到亞撒黑橫下去死掉个地方，全部停腳企等。
24 總係，約押㧯亞比篩䟘起來追押尼珥。日頭下山个時，佢等來到亞瑪山，就係在基亞个東片，通到基遍曠野个路上。
25 便雅憫支族又聚集所賸个人跈等押尼珥，掌等一座山頭。
26 押尼珥對約押大聲喊講：「𠊎等愛一直㓾下去麼？敢講你毋知，到頭來雙方个冤仇會越結越深？𠊎等係你个同胞，你還愛等幾久正下令停止追𠊎等呢？」
27 約押講：「𠊎指等永生个上帝發誓，若毋係你開嘴，天光朝晨以前，𠊎个軍隊還係會追你等。」
28 所以約押歕羊角，命令佢个軍隊毋好再逐以色列人，相㓾就停下來。
29 押尼珥㧯佢个軍隊透夜行軍，經過約旦山壢，過約旦河，又行歸朝晨正轉到瑪哈念。
30 約押追押尼珥轉來以後，就聚集佢所有个軍隊，發現少亞撒黑以外，還少大衛个人十九儕。
31 總係大衛這片个軍隊㓾死押尼珥對便雅憫支族帶來个人共三百六十儕。
32 約押㧯部下將亞撒黑个屍體帶到伯利恆，葬在佢等家族个墳墓肚。然後，約押㧯跈佢个人透夜行，到天光正轉到希伯崙。